Duodje- ja digitálamuitalusat -oahppu álgá čakčat

AIDA-prošeakta váldá fas ođđa lávkki go Sámi allaskuvllas álgá oahppu Duodje- ja digitálamuitalusat čakčat 2017. Oahppu lea oassin Interreg AIDA-prošeavttas (Arctic Indigenous Design Archives), masa Sámi allaskuvla, Ájtte musea ja Sámi arkiiva Anáris leat searvan.
Loga eambbo oahpu birra dáppe 

Gietka Diehtosiiddas, govven Liv Inger Somby

 

Duodje- ja digitála muitalusat -oahpus studeanttat ohppet geavahit arkiivvaid ja dávvirvuorkkáid vuođđun iežaset duddjomis. Studeanttat galledit Sámi arkiivvas Anáris ja Ájttemuseas Johkamohkis. Sii ohppet, mo sáhttá sin duodji leat visuálalaččat geasuheaddji ja mo sin duojis lea beaktilis muitalus. Praktihkalaš duddjon ja hábmenoassi leat guovddážis, go galgá hárjehallat duddjot ja ráhkadit muitalusa.

Oahppu heive sidjiide, geain lea iežaset fitnodat dahje lea plánen cegget dakkára. Dat heive maiddái duoji bachelora studeanttaide.Oahppu addá 15 oahppočuoggá. Gáibádusat beassat ohppui leat dábálaš sisabeassangáibádusat alitoahpahussii. Oahpahusgiella lea davvisámegiella, muhto eará sámegielat studeanttaide láhččo dilli nu ahte sáhttet geavahit iežaset sámegiela dahje eará giela. Eambbo dieđuid oahpu birra oažžu Sámi allaskuvllas.