onsdag 25 mars 2020

AIDA II -fidnu lea vuolgán johtui


AIDA -prošeakta lea ožžon ruhtadeami joatkaprošektii AIDA II - arkiiva doaibmin dála áiggis. AIDA IIs ulbmilin lea vuodjut arkiivva geavaheddjiid dárbbuide. Prošeavttas ohcat čoavdosiid dasa, mo studeanttat/dutkit/geavaheaddjit sáhttet fidnet ođđa geainnuid árkiivvaide ja mo mii sáhttit fievrridit árkiivva bargguid nu ahte lea heivvolaš álgoálbmot lahkonanvugiide. Prošeakta bistá 30.9.2022 rádjái.

 

AIDA II -prošeavtta stivrenjoavkku doalai vuosttaš čoahkkima 19.3.2020. Coahkkimis ledje mielde Anna Westman Kuhmunen Ájtte-museas, Gunvor Guttorm Sámi allaskuvllas ja Inker-Anni Linkola-Aikio Sámi arkiivvas. Dan čoahkkima fertiimet doallat gáiddusin mátkkoštangildosiid dihtii. Čoahkkin lei dattege hui movttiidahtti ja buohkat ledje buori mielas plánet prošeavtta doaimmaid, vaikko fertiimetge mearridit maŋidit vuosttaš jagi doaimmaid nugo bargobájiid mátkkostan- ja čoahkkánangildosiid dihte. Aitto dál buot prošeavtta miellahttuásahusat barget rekryteremiin. Dasa lassin diehtojuohkin ja plánenbarggut leat áigeguovdilat.


AIDA II -hanke on käynnistynyt