torsdag 16 mars 2017

Arctic Indigenous Design Archives -haʹŋǩǩõs älgg

Meersažarkiiv (Sääʹmarkiiv), Ájtte sääʹm-museo Ruõccjânnmest da Sámi allaskuvla (Sääʹm õllškooul) Taarrjânnmest alttee Arctic Indigenous Design Archives (AIDA) -õhttsažtuâjjhaʹŋǩǩõõzz, koon jurddjen lij sääʹm ååʹbleemteâđ seeiltummuš da serddmõš pueʹtti puõlvvõõǥǥid. Kolmmekksaž interreg-õhttsažtuâjjhaʹŋǩǩõõzzâst tuejjeet tuejjrivuiʹm (duojár, säʹmmlaž ǩiõtt-tuâjjlaž da ååʹbleei) õhttsažtuâj ååʹbleemprosessa kuulli äʹššǩeʹrjjaunstõõzzi seeiltem diõtt. Sääʹmarkiiv da Ájtte-museo kaartʼte da rueʹǩǩe tuejjri (duojár, säʹmmlaž ǩiõtt-tuâjjlai /ååʹbleei) aunstõõzzid duojár-arkiiven. Haʹŋǩǩõõzzâst kaartʼtet da ruõkkât tuejjri (duojár, sääʹm ǩiõtt-tuâjjlai/ååʹbleeʹji) arkiivid Sääʹmarkiive Lääʹddjânnmest da Ájtte-museooʹje Ruõccjânnmest. Arkiivin jeät kõskknuku neävvaid, peʹce jurddjen lij puʹhtted õuʹdde arkiivaunstõõzz, kååʹtt sueiʹmkrâstt tuejjar (duojár) raajjâmtuâj, ååʹbleemjorddmõõžž di jiiʹjes ååʹblkâšttmõõžž markknâʹsttemproseeʹss.

Haʹŋǩǩõõzzâst vuâđđuum tuejjar-arkiivid ââʹnet Sámi allaskuvla (Sääʹm õllškooul) Duodji-mättkuursin (duodji=sääʹm (čeäppõs)ǩiõtt-tuâjj, ååʹblummuš). Sámi allaskuvla mättʼtõõttjid arkiiv da museo toiʹmmje inspirõʹstti mättjemǩeʹdden, koi veäkka tobdstõõđât ärbbvuõđlaž tuõjju, tuejjri jiiʹjjes historiaaʹje da mäʹttjet mainsted jiiʹjjes ååʹblkâʹsttemjurddji pirr digitaalʼlanji.

Projeeʹktest raajât še päärnaid da nuõrid šiõttlõs digitaalʼlaž ååʹbleem-mättmateriaal haʹŋǩǩõõzzâst norrum arkiivi vuâđald. Täävtõssân lij juäʹtǩǩed õõudâs teâđ sääʹm tuâjast da tuejjrin päärnaid da nuõrid da seämma poodd staanâd äʹrbbvuõđlaž teâđ serddmõõžž pueʹtti puõlvvõõǥǥid.

Haʹŋǩǩõõzz teäggte EU interregNord V/Sápmi -programm, Lappi lett, Nordlands fylkeskommune, Troms fylkeskommune, Statens Kulturråd Ruõccjânnam di Lääʹdd-ruõcclaž kulttuurfondd (Kulturfonden för Sverige och Finland).

pâjjtaʹrǩsteei (Sääʹmarkiiv) Inker-Anni Linkola, etunimi.sukunimi@arkisto.fi, 029 533 7042
tuʹtǩǩeemjååʹđteei (Meerarkiiv) Päivi Happonen, etunimi.sukunimi@arkisto.fi, 029 533 7018
projeʹkttjååʹđteei /arkiivhoiʹddjeei (Ájtte Svenskt Fjäll- och samemuseum) Ulf Stefan Winka, info@ajtte.com +46 971 170 70
dekaan (Sámi allaskuvla) Seija-Risten Somby seija.somby@samiskhs.no , +47 784 484 54





Inga kommentarer:

Skicka en kommentar