Riikaarkiiva (Sámi arkiiva) Suomas, Ájtte sámemusea Ruoŧas ja Sámi allaskuvla Norggas álggahit Arctic Indigenous Design Archives (AIDA) – oktasašbargofidnu/prošeavtta, man ulbmilin lea sámi hábmenmáhtu seailluheapmi ja sirdin čuovvovaš buolvvaide. Interreg-ovttasbargoprošeakta bistá golbma jagi. Prošeavtta olis dát institušuvnnat ovttas duojáriiguin ja hábmejeddjiiguin arkiverejit materiála mii čoaggana duodjeproseassain. Suoma Sámi arkiiva ja Ruoŧa Ájtte-musea kártejit duojáriid áššegirjjiid ja vurkejit daid “duojár-arkiivan”. Arkiivvain eai leat guovddážis dávvirat, muhto ulbmilin lea ovdanbuktit dan áššegirjemateriála, mii speadjalastá duojára duddjoma, hábmenjurddašeami ja hábmema márkanastinproseassa.
Prošeavttas vuođđuduvvon duojár-arkiivvat geavahuvvojit Sámi allaskuvlla duodjeoahpahusas. Sámi allaskuvlla studeanttaide arkiivvat ja musea doibmet movttiidahtti oahppangáldun, man veagas oahpásmuvvet árbevirolaš duodjái, duojáriid persovdnahistorjái ja maiddái ohppet muitalit iežaset hábmenjurddašeamis digitálalaččat.
Prošeavttas ráhkaduvvo maiddái mánáide ja nuoraide heivvolaš digitálalaš hábmenbajásgeassinmateriála prošeavttas čoggojuvvon arkiivvaid vuođul. Ulbmilin lea gaskkustit dieđuid sámi duojis ja duojáriin mánáide ja nuoraide ja seammás sihkkarastit árbevirolaš dieđu sirdáseami čuovvovaš buolvvaide.
Prošeavtta ruhtadit EU Interreg Nord V/Sápmi-prográmma, Lappi lihttu, Nordlándda fylkkasuohkan, Tromssa fylkkasuohkan, Ruoŧa Statens Kulturråd, Suoma-Ruoŧa kulturfoanda (Kulturfonden för Sverige och Finland.).
Eanet dieđut:
Bajitdárkkisteaddji (Sámi arkiiva) Inker-Anni Linkola, ovdanamma.sohkanamma@arkisto.fi, 029 533 7042
Dutkanhoavda (Riikaarkiiva) Päivi Happonen, ovdanamma.sohkanamma@arkisto.fi, 029 533 7018
Prošeaktajođiheaddji/arkivára (Ájtte Duottar- ja Sámemusea) Ulf Stefan Winka, info@ajtte.com +46 971 170 70
Dekána (Sámi allaskuvla) Seija Somby, ovdanamma.sohkanamma@samiskhs.no, +47 784 484 54
Inga kommentarer:
Skicka en kommentar