torstai 16. maaliskuuta 2017

Arctic Indigenous Design Archives -haahâ vuálgá joton

Aalmuglâšarkkâdâh (Sämiarkkâdâh), Ájtte sämimuseo Ruotâst já Sámi allaskuvla (Säämi ollâškovlâ) Taažâst pieijih joton Arctic Indigenous Design Archives (AIDA) - ohtsâšpargohaavâ, mon tárguttâs lii säämi hammimtiäđu siäiluttem já sirdem puáttee suhâpuolváid. Kulmâihásii Interreg-ohtsâšpargohaavâst pargeh tyejičepijguin ohtsâšpargo hammimprosessân lahtoo äššikirjeamnâstuvâi siäilutmân. Haavâst kärttejeh já vyerkkejeh tuáijárij arkkâduvâid Sämiarkkâdâhân Suomâst já Ájtte-museon Ruotâst “duojár-arkkâdâhhân”. Arkkâduvâin iä vuájudât tiŋgáid, peic ulmen lii pyehtiđ oovdân arkkâdâhamnâstuv, mii čáittá tuáijár tuoijum, hammimjurduid sehe jieijâs hammim markkânistemproosees.

Haavâst vuáđudum tuáijár-arkkâduvah annojeh Säämi ollâškoovlâ Duodji-oppâkuursâin. Arkkâduvah já museo tuáimih Säämi ollâškoovlâ uáppeid movtijdittee oppâmkieddin, mon vievâst sij uápásmeh ärbivuáválii tuáján, tuáijárij olmoošhistorján já máttájeh mainâstiđ jieijâs hammimjuurdâšmist digitaalhäämist.

Projektist rähtih meid párnáid já nuoráid hiäivulii digitaallii hammimšoddâdemmateriaal haavâst nurrum arkkâduvâi vuáđuld. Ulmen lii sirdeđ tiäđu sämityejeest já tuáijárijn párnáid já nuoráid já siämmást visásmittiđ ärbivuáválii tiäđu sirdâšume puáttee suhâpuolváid.

EU interreg Nord V/Säämi -ohjelm, Laapi litto, Nordland leenâ, Roomsâ leenâ, Statens Kulturråd Ruotâ sehe Syemmilâš-ruátálâš kulttuurruttârááju (Kulturfonden för Sverige och Finland) ruttâdeh haavâ.

Lasetiäđuh:
Pajetärhisteijee (Sämiarkkâdâh) Inker-Anni Linkola, etunimi.sukunimi@arkisto.fi, 029 533 7042
Tutkâmhovdâ (Suomâ Aalmuglâšarkkâdâh) Päivi Happonen, etunimi.sukunimi@arkisto.fi, 029 533 7018
Proojeekthovdâ/arkkâdâhtipšoo(Ájtte Svenskt Fjäll- och samemuseum) Ulf Stefan Winka, info@ajtte.com +46 971 170 70
Deekaan (Säämi ollâškovlâ) Seija-Risten Somby seija.somby@samiskhs.no, +47 784 484 54

Ei kommentteja:

Lähetä kommentti